Бур пӧтмӧн таво ми «сёим» чужан лунтӧ дона Сыктывкарнымлысь

Быдса ӧд вежон гажӧджчӧмным артмис. Кыдзи заводитім воддза воторниксяньыс сьывны, да йӧктыны, да ворсны шӧринлӧн ӧшинь уланым, со сӧмын на тайӧ воторникнас эштӧдім!

Эз ло, майбыр, увтыртӧма юркарнымлысь, мед кӧть и абу гӧгрӧс, пастӧ. Миян бердын олысь-вылысь пӧшти став землячествоыс сьӧрсьӧн-бӧрсьӧн висьталіс карнымлы ӧта-мӧдкӧд ӧткодявны позьтӧм сиӧмъястӧ. Кодлӧнкӧ сійӧ артмис кывбураджык, кодлӧнкӧ йӧктана-сьыланаджык, а кодлӧнкӧ и уна пӧлӧс серпасъяса.

Но та йылысь ми тіянлы, дона ёртъяс, ставсӧ нин тані, асланым лист бокын, висьтавлім. Та понда ті тайӧс ставсӧ тӧданныд. А кодкӧ тіян пиысь воліс быд миян гажӧдчӧм вылӧ, мыйысь и сылы, и миянлы вӧлі зэв нимкодь.

Кыдз казьтыштім нин, муса Сыктывкарнымӧс чолӧмавны ми эштӧдім сӧмын тӧрыт, лӧддза-номъя 12 лунӧ. Дерт, миян вынным (артистъяскӧд) ӧкмис на эськӧ и нӧшта гоз-мӧд вежон вылӧ, но, чайтам да, тырмылас неуна. Быдторлы аслас кад. И гажӧдчӧмлы тшӧтш.

А тӧрытнад (талунъякӧд кӧ ӧткодявны), поводдяыс лӧсьыда на лэдзис миянӧс гажӧдчынытӧ. Муртса койыштліс зэр тусьяснас, но эз жӧ, бытттьӧ лысьт бур йӧзыдлысь гажӧдчӧмтӧ дзикӧдз торкны.

Миян ӧшинь улын тӧрыт збылысь вӧлі лӧсьыд. Йӧзыс кежалісны кывзыштны радейтана либӧ тӧдтӧм артистъястӧ быттьӧ асланыс йӧрӧ. Здук кежлӧ пуксьыштлісны кывзыны да кольччылісны помӧдзыс.

А нимкодясьны вӧлі мыйысь. Куим час чӧж ӧта-мӧдсӧ вежӧмӧн миян кильчӧ бокын ассьыс артистасьӧмсӧ петкӧдлісны кыдзи ӧткӧн сьылысьяс, сідз и сьылан котыръяс. Миянсянь ылӧдз юргис и гитара, и гудӧк, и аккордеон, и скрипка шы. Видзӧдысьяс удитісны и сьылысьяс бӧрся босьтавны, и йӧктыны, и ворсны. Кодкӧ кывзігмозыс ветлӧдліс да любуйтчис «Фотокеркалӧн» татчӧс да ылі муысь вайӧм снимокъясӧн, ньӧбаліс «Анбур» небӧг лэдзанінлысь выль петасъяссӧ, Коми ремесленнӧй палаталысь бӧрйис кажитчана чачаяс. Лы-сьӧмӧн легӧм кындзи, миян гӧсьтъяс тані жӧ шонтысисны воййыв туруна пӧсь чайӧн.

Кодкӧ со тайӧ лунас вӧлі медводдзаысь на аслас синнас аддзылӧма важ коми кӧлуй: дӧрӧм-сарапан-юркытш-гач. Кодкӧ вом паськӧдӧмӧн чуньнас видлаліс важ коми кыйсьысь-вӧралысьлысь пелыссӧ, пестерсӧ да гымгасӧ. Кодкӧ бергӧдліс киясас нистысян да мырдӧн кӧсйис гӧгӧрвоны, мый сійӧн вӧчлӧмаӧсь важ коми аньяс. А кодкӧ зільӧмысла весиг кыв йывсӧ мыччӧмӧн печлаліс шегъяс. Быдӧнлы, майбыр сюри сьӧлӧм бурмӧданаторыд. Та вылӧ и ӧтув гажыд лӧсьӧдӧма, мед быдӧн вермис босьтыштны аслыс лӧсяланатортӧ да видзны сійӧс морӧсыслӧн медся дона пельӧсас.

Зэв ыджыд аттьӧ артистъяслы, кодъяс асланыс шойччан лунӧ эз пышйыны сикт-дачаясӧ, а водз асывсяньыс локтісны, баситчисны, мед вӧчны карса олысьяслы да воӧм гӧсьтъяслы ыджыд праздниктӧ.

Быдӧнӧс, дзик быдӧнӧс аттьӧалам! Миян шӧринысь «Эжва катыд», «Сыктыв му», «Томлун» сьылан котыръяс да медмича ссьылысьсӧ Анна Ульяноваӧс. Миян шӧринлысь ёртъяссӧ: «Регион 11» да «Экспромт» сьылан-ворсан котыръясӧс. Миян шӧринлысь зэв ыджыд ёртъяс-сьылысьясӧс: Александр Швецов да Алексей Поповӧс.

Нӧшта ӧтчыд чужан лунӧн, дона Сыктывкар! Мӧд во ӧтув бара на пӧттӧдз «нимлунасям»!

komi 004

komi 002

komi 001

komi 003